Alamire - Dir. David Skinner
O splendor gloriae et imago substantiae
Dei Patris omnipotentis, Jesu Christe,
unice eiusdem Fili dilecte totius boni fons vive,
redemptor mundi, servator, et Deus noster, salve.
Gloriosa, Domine, tua est maiestas,
et opera mirabilia: tu caelum et terram
cum omnibus quae in eis sunt creaturis
divino tuo verbo ex nihilo fecisti:
quae sapientissimae mox disponens, nobis quos
ad imaginem tuam novissime formasti, ut deservirent,
benignissime cuncta subdidisti.
Mortem intulerat protoplasti inobedientia;
sed quo facturae tuae vitam redimeres,
de Maria virgine humillima, Jesu,
sumpsisti carnem: ex qua enim
de Spiritu Sancto conceptus, natus es Deus et homo,
ac illa tua mater integra
permansit et perpetua virgo.
Et cum pro nobis duram tolerasses vitam,
flagris caesus et tormentis laceratus,
qui peccatum non feceris, in corpore tuo
scelera nostra perferens, ac eadem
tuo pretiosissimo sanguine effuso abluens,
mortem denique infamem, agnus mitissimus,
passus es et crudelissimam:
hinc, tuo Patri suavis hostia oblatus,
pro nobis miseris peccatoribus es afflictus.
Dein, tertia die a morte exsuscitatus,
ad caelestem Patrem cum gloria summa es elevatus,
ut illi dexter assideas;
inde sanctum Paracletum nobis dedisti,
qui ut nostra caelesti doctrina confirmet pectora,
te prece precamur humili. Amen.